19-05-07 12:15
حجايات ابو سليمان ويه البيت العراقي
aboslamman@yahoo.com
*كان يا مكان في قديم الزمان وقد يكون في هذا الزمان والمصيبه اذا جان
هذا بعد السقوط وهليام .اكو دائره او شركه يديرها مدير عام صدفه جان
خوش انسان ومحرم البوك وداير ما دايره جاب الطيبين واليفتهمون وما
يبوكون هذا بهل الوكت بصعوبه ايعيش وبصعوبه اتشوفه . ليش مو حظه الاسود
يجي كتاب من الجهات العليا يكول يتحمل المدير العام مسؤولية تدقيق
الشهادات العلميه خاصه للموظفين الراجعين جديد , وانتوا اتعرفون هوايه
رجعوا للوظيفه بعد السقوط , الى هنا زين , ليش ما واحد من اللي راجعين
للوظيفه جان بزمن السابق فاصليه من الوظيفه لاسباب خلقيه (لواط ) جان
جايب شهادة من الجامعه التكنولوجيه من قسم السيطره والنظم وهو جان فني
كبل والجماعه شاديله راتب ومنطيه لقب رئيس مهندسين , هذا ما جاب
الشهاده مالته برغم المطالبات الكثيره من قسم الافراد , المدير العام
فاتح الجامعه كلوله هيج كلاوجي ما عدنه , اشسوه هذا المدير المسكين
فاتح الجهات العليا والنزاهه بالموضوع. المزور هذا نقل خدماته لمكتب
المفتش العام ( لان يعرف من اين تاكل اللكمه) ورايح جاي بغرف هيئة
النزاهه وصار هو صاحب البيت هناك. العفو نسيتوني اكلكم هذا المزور طور
شغلته وجم ابنيه حلوه صار الدلال مالتهن وتعرفون هاي الشغله هليام كلش
قويه خاصه وان المدير المسكين جان يحب دائرته هوايه ومتحيز للشركه
مالته كلش هوايه وما يخلي الهلفتيه من ان يتعاونون ويه الشركات الاهليه
وانتوا اتعرفون هذوله الشركات تدفع هوايه , حتى اكو حجايه ان راس
المدير هذا انباع ب100 الف دولار من وحده من الشركات.
زين صار المزور عنده امكانيات جديده ويه فلوس الشركات صار قوه هائله
وصار كارتل وصار فاك صدره ويمشي بالنزاهه ويلعب لعب . اتعرفون اشسوه
جاب هذا المدير وذبه بالنزاهه ( طالما الجماعه عرف ) وبعدين جم يوم سجن
ولما جان يحققون ويه المدير بدعاوي طبعيا كيديه جان المدير يسمع ضحكات
وقهقهات هذا المزور, واللي يحقوقون ويه المدير من محقق الى قاضي
التحقيق طبعا اصدقاء هذا المزور للامكانيات الجبيره الي عنده. اما مصير
الدعوه الي قدمها المدير للجهات العليا وللنزاهه, الاوله محد لا رفع
ولا كبس ( لان الامكانيات قويه ) اما النزاهه فذبت المدير بالسجن مكان
ما اذب المزور وتحقيق واخذ وجيب والمزور دقيقه ما دخل للسجن وسدوا
قضيته بالنزاهه ( مو كلتلكم امكانياته قويه جدا ) وذاك هو رايح جاي
ونافخ صدره ويهدد المدير بان المحكمه الي وره النزاهه راح اتكص المدير
كص هو وجماعته . نسيت اكول ان قاضي التحقيق الي حقق ويه المدير وشلون
صدفه يصعدوه الى قاضي بالمحكمه الي راح اتحاكم المدير ( سبحان الله
شلون صدفه) ولو هي قانونا ما اتصير بس بهل وكت كلشي ايصير.هنا اريد
اكول طالما حكومتنه اسلاميه والمسؤولين عدهم لحيه زغيره وما لابسين
ربطة عنق ويتوضون قبل الصلاه ويقرون الدعاء بعد الصلاه اريد اكول هنا
وانا مسؤول كدام الله سبحانه وتعالى ان المسؤول الجير للدوله رئيس
الحكومه ما راح ايشوف الجنه بالاخره وكبل للنارلان هاي اتصير تحت
رعايته وكذلك المسؤولين بالوزاره هم كبل للنار وياهم القاضي راضي
والشله مالته المحقق وقاضي التحقيق ورئيس المحاكم الجبير كلهم بالنار
وياهم المشهداني رئيس مجلس النواب اذا ما استجاب لدعاء المدير الي يكول
اذا طلعت عليه ادانه ازغيره انا اوقع على الاعدام بس مو كدام هاي
المحاكم اريد محكمه كدام مجلس النواب وينقلها التلفزيون ويحضرها اعضاء
المحكه العليا والقضاة المتقاعدين لان قضاة هل الوكت تره طك عطيه
والمزور صاحبنا بامكانيته القويه ..........
* جميع مستندات مال القضيه السابقه موجوده مصوره عدنا ومستعدين انقدمها
لكل شريف بهل البلد . خاطر ايشوفون شلون يحاربون الموظفين الشرفاء لو
كتل لو نقل لو نزاهه وبعدين سجن , تحياتي على من ورد اسمه اعلاه.
* اعلن وعلى لسان المتحدث باسم الحكومه وياهه جان هوايه من المسؤولين
الكبار بالقضاء وحتى القاضي راضي هم وياهم انه راح تشكل لجنه لمحاربة
الفساد في الدوله واللجنه اضم من رئاسة الوزراء الى مجلس القضاء الاعلى
الى ديوان الرقابه الماليه الى هيئة النزاهه . اريد هنا اكول شراح اسوي
اللجنه هاي بالقضيه السابقه وهل يبقى ذاك المزور فاك صدره وصاير عنتر
زمانه (طبعا بامكانياته القويه ) ولو راح انشوف العجب وانشوفه احد
اعضاء اللجنه الموقره هاي الي شكلت جديد . شنو راي اللجنه بالفساد الذي
ينخر اعظام النزاهه نفسها . زين القضاة الي ياكلون السحت الحرام
شسويلهم , ما تعتقدون ان العقوبه لازم اتكون قويه على القاضي والمسؤول
على النزاهه لما ياخذ فلوس ويكلب الحقائق ويخلي المجرم بره والبرىء جوه
بالسجن . ولا ادري راي هذوله اصحاب اللحايه الزغيره وبلا ربطة عنق هاي
حرام لو حلال , وتحياتي.
*قطار الموت : كل مناضلين البلد تعرف بهذا القطار المشؤوم والي صار
بعدين رمز للمناضلين , بس هاي الحادثه تقريبا انمحت بزمن النظام السابق
ليش لان الاجه جان ادهى وامر واذا جان قطار الموت يسفرون بيه المناضلين
من ابناء البلد الى نكرة السلمان بعدين شنو هالوج الكلب تعال دزه من
مكان الى اخر خو دفعه زغيره باحواض التيزاب والاعدام الفوري بمكانه
والمقابر الجماعيه موجوده وقريبه هذي غطت على احداث قطار الموت .
*موكبنا ياكل تمن وطرشانه يا حجي شيخه : شعار لاحد المواكب الحسينيه من
اهالي احد المدن الجنوبيه باربعينية الامام الحسين ,وانا اشوف هاي (
الرده) كلشي ما اتاثر على الحكومه ولا حتى على المصرف او القائمقام ,
لعد ليش بزمن الاول جانوا مانعيهه , ونتيجتها ولدت عصبيه الان انشوفهه
بالشارع . احنا لما جنا اطفال جان يقام عزاء الحسين في بيتنا , ابيوت
كبل جبيره وشرقيه ومفتوحه وعليها سياج فوك السطح وجنا نفرش البيت
بالزوالي من العصر ما اكول زوالي عجميه اخاف يجي واحد ويكول زوالي
صفويه وجان الزلم يجون بعد صلاة المغرب والنسوان فوك السطح وداير ما
داير السياج ، الكل يحضر الماتم حتى الصابئه هم يحضرون ويانه اصلا ما
جنا نعرف شنو سنه وشنو شيعه حتى ابن خالتي سني آلوسي ما يحلف الا
بالعباس ابو راس الحار. ليش بعدين ولما بنينا بيت ام الجهال نذرت انه
اسوي قرايه للحسين بالبيت الجديد وهاي عيني اشوكت بالتسعينات واليسوي
قرايه ابو ابوه يسمطوه, عزمنه بعض الاخوان مو كلهم لحتى الجيران لا
يحسون وحتى لا يسمعون جبت مولده وشغلتها بالحديقه الزغيره الخارجيه
ومرت تقريبا الحادثه على خير ,السنه الثانيه صار التشدد اقوه فكلنا
انسوي القرايه بس احنا الي بالبيت واكو جان فراش بالدائره يقره عالحسين
اجه هو وابنه وهم نفس الشي المولده شغلتها حتى لا ينسمع الصوت كل شويه
اكله للرجال صوتك نصيه , السنه الي وراها كلت لازم اوكف بوجه المره
واكلول لا واقنعتها انه ننطي فلوس للفقره احسن وبعد لا نصي صوتك ولا
مولده ولا هم يحزنون .
* الاخ ناجي نهر تحياتي لك ولمقالك الجميل حول المرأه وحقوقها ودورها
بالمجتمع ودور المجتمع وما يجب ان يقدمه للمرأه, من جهه ثانيه ذكرتنا
بالفنانه الكبيره زينب ولما توكف وكفتها العملاقه على المسرح حيث جنه
حريصين ان انشوف كل اعمال فرقة المسرح الفني الحديث . اكول يااخي جانت
ذيج الايام احسن وجانت المرأه ماخذه من الحقوق انكول زينه, وجان الشعب
هم مثقف اكثر من هذا الوكت بهوايه , تذكر لما جنا نطلع من السينما
الدور الثاني ( سينما النصر وسينما غرناطه وبعدين اطلس والحمراء وحتى
السندباد ) مثل ايام فلم العصفور وفلم زد ذيج الايام الحلوه جنا لما
نطلع ابنص الليل وجان البنات يحضرن هاي العروض ويطلعن بالشارع محد اله
شغله بيهن ورجعن بامان للبيت , وجانن يحضرن الحفلات والندوات والسفرات
والمسرحيات مو مثل نسوان مجلس النواب حتى لابسات ربطات على ايديهن .
والسلام عليكم
